गोरबोली [बंजारा] कविता

 सेवाभाया 
""""""""""""""""""""""
हुंदका दाटरो छं कंठेम,
आसू आरे छ आखीम.
सामळ जानी रे सेवाभाया,
तू होटो फरन रे आजा.

घरेम अन भार धुंडो,
धूंडो तोन म वनेमाई.
तू कतीच कोनी दिखायो,
कोनी दिखायो तू मंदिरे माई.

सेवाभाया कनी मन तू कतछी,
तू आन कनी मारे काने माई.
घणे सवाल आरे छ मने माई,
तू होटो फरन रे आजोनी...

तारे बिना जिंदगी आधुरी,
तारे बिना हामेन करमेनी.
एक विनवणी तोन भाया,
तू होटो फरन रे आब आजा.

सामकी याडी तू तरी आब मन केद,
आज का कोनी दिखारो सेवाभाया.
याडी, सारी गोरुर तोन एक मागणी,
मारे सेवाभायान होटो फरन लादनी.
सामकी याडी, सेवाभायान लादनी.

©️ कवी: दिनेश राठोड
          चाळीसगाव
_______________________________

मास्तर...

"""""""""""""""""""
मास्तर, तमार काळो फळा कनाच चलगो..
आब धोळो आयछ.....धोळो...
अन् पोरपोऱ्यार आयुष्येमायी,
ई धोळो रंग "काळ"लायचं....
देख मास्तर.... काळ.... मास्तर काळ.

आबेर ई मतलबी जगेर,
जाण करन कोणी दिने करन,
मास्तर, आजेर पोरपोऱ्या देखो,
गुंडागिरी, दहशतवादी, गुन्हेगारी,
आत्रच कोनी बलात्कारी भी,
बणगे छ... मास्तर...
येन जबाबदार पोरपोऱ्या कोनी मास्तर,
तमच छो..... तमच छो....

म पंतप्रधान, राष्ट्रपती,
अन् धनपती हेगो तो..?
आसे काल्पनिक जगेम मत जगाव...
वास्तावेती नाळ जुळाव.. मास्तर...

कारण,आज हमार पोरपोऱ्या,
१००% गुण मिळान भी,
सुशिक्षित बेरोजगार हेगे छ मास्तर...

करन केणू वाट छ मास्तर....
आजेर पोरपोऱ्यान "मनक्या" पर कोनी,
मनक्यामायीर शिकाव मास्तर.....
मनक्यामायीर.........

ऊ फक्त कागदी परिक्षाम,
पास हेय करता कोनी,
"ऊ  जीवनेर परिक्षाम...
पास हेणू छाय..."  मास्तर...
"जीवनेर परिक्षाम....
पास हेणू छाय....

©️ कवी दिनेश राठोड (जिजाईसुत)
मो. नं.7391939846

_______________________________

घर छोडेवणा...
""""""""""""""""'"""
याडी, म घर छोडेवणा,
तार आँखी मायीती पाणी निकळ छ.
अन् मारे बापेर आखिम तो,
मन महासागर साठमेलेलो दिखाव छ.

मन ध्यान छ तार पगू पडेवणा,
तू मार मातेप हात मेलती थी.
अन् घणो सिख,मोठो साहेब हेजो,
हानू तू आँखीतीच मन केती ती.

मारे बापेर आँखीमायीर महासागर,
अन् याडी तारो मायेरोर पदर.
न समजन मार मनेम साठतो तो,
एकांतेम मारो मन घणो रोतो तो.

पच मन ध्यान भी आती थी ,
मारे बापेर आँखी मायीर पाणी.
तडके माई राबेरो तमार,
जीवनेर दर्दभरी कहानी.

तमार ध्यान करन करन,
शिके पुरता स्फूर्ती मळती थी.
पुस्तके मायीर सारीच चित्रेम,
याडी, तुच मन दिखाती थी.

©️ कवी दिनेश राठोड(जिजाईसुत)
मो. नं.7391939846
_______________________________

याडी कनी मारे बापेन
"""""""'""""""""""""""'

याडी, तू कनी मारे बापेन,
आजो आज दारू छोडन.
अापनो संसारे र हेगो राख,
आपणी जिंदगीर हेगो विनाश.

बापेर कारण म कुंवारी रेगी,
बाप मारी वात सामळेनी.
काई केय लोक आपणे न,
कुण आय मन देखेन.

याडी कतराक दन ?
इ सारी करीस सहन.
याडी तू कनी मारे बापेनं,
आजो आज दारू छोडन.

रोज ऊठन दारू मायी,
तोन रोज-रोज मार छ.
आपणी जीवने माई,
अमावसेर अंधारो छ.

याडी ई दारू रे कारण,
वासेक घरेर हेगो नास.
मारे बापेणं आब तरी केद,
मत पि दारू, आब तरी छोडद.

याडी, तू कनी मारे बापेन,
आजो आज दारू छोडन.

©️ कवि दिनेश राठोड (जिजाईसुत)
       मो. नं.7391939846

_______________________________

   बाप

छोरा कच -

बा, मार कपडा फाटगो,

मन नवो झिगला हेणु.

याडी कच -

मार साडी वसकरी  छ.

मन नवी साडी हेणु.

बाप जिंदगी भर देतो गेव.

दोई माई  जिंदगी भर फाटतो गेव.

वसके वाळी  साडी सरीखो.

स्वतः रच नशीब वसकातो  गेव.

©️®️ कवी दिनेश राठोड(जिजाईसुत)

  मो. नं.7391939846
_______________________________
आरक्षण
"""""""""''"""""""""""

भाईयो सारी हेन जागे हेगे,
आब आपण भी जागे हे जावा.
सामळ किसन्या - राम्या,
आब तरी आपण एक हे जावा.

बोले सिवाय काई हेनी,
मांगे सिवाय काई मळेनी.
ध्यान करो आपणी कहाणी,
सेवा अन् वसंता री वाणी.

आरक्षण सारी हेन मांगरे छ,
तो आपण का होटो रेवा .
आरक्षणेर लढाई लढे करता,
सामळो आब तरी एक हे जावा.

घणे दन अजाण रिदे,
आब घडी आवगी छ.
सारी हेन एक हेताणी,
आरक्षणेरी लढाई जिंकेर छ.

©️®️ कवी दिनेश राठोड(जिजाईसुत)

  मो. नं.7391939846
_______________________________

                नंगारा

सामळलं गोरभिया केर तरी आवाज आरो छ.
पोहरागडेन मारे सेवलालेर नंगारा घुमरो छ //धृ//

आपणे गोर संस्कृतीर लढाई हेती,
सारी हेन मिळण दखाळे एकी,
मारे समाजेरो उध्दार हेरो छ.....
मारे सेवालालेरो नंगारा घुमरो जगेम छ //१//

अापणे संस्कृतीरो आवाज घुमीय जगभर,
जसो आपणो होळी अन् दवाळीरो त्योहार,
सेवा अन वसंतारी वाणी खरी ठररी छ.....
मारे सेवालालेरो नंगारा जगेम घुमरो छ //२//

याडी,काकी, दादीए तम भी सामळलो,
आब आवगे छ अाच्छे दन आपणो,
मारे गोरूर आब इतिहास घडरो छ.....
मारे सेवालालेरो नंगारा जगेम घुमरो छ //३//

आपणी अभिमानेती छाती फुगरी छ,
मारे गोरूर सपनो आब पूरो हेरो छ,
मारे गोरूर केसुला आब फुलरो छ.....
मारे सेवालालेरो नंगारा जगेम घुमरो छ //४//

©️®️ कवी दिनेश राठोड (जिजाईसुत)
            चाळीसगाव (जळगाव)
            मो. नं.7391939846

_______________________________

             बोलो सेवालाल

आपणे सेवालालेरी जयंती सारी हेन मनावा.
गोर बंजारेरो राज आब आपण लावा.
15 फेब्रुवारी जगेम घुमरो......२
एक साथ बोलो.....
बोलो सेवालाल सेवालाल बोलो सेवालाल सेवालाल...

अरे बंजारा वाघेर ताकद आब दखाळादो,
आपणे सेवारो झेंडा सारी जगेम लगादो.
करसनभाऊ हात जोडनं, केरो जगेन,
बोलो भाईयो बोलो सेवालाल सेवालाल सेवालाल.....

बंजारा युवा सेनारो सदा साथ छ,
सेवालालेरो आपणेन आशीर्वाद छ.
वसंता फुलरो जगेम,एक हेजाव लढेन,
बोलो भाईयो बोलो सेवालाल सेवालाल सेवालाल....

©️®️ गीतकार: दिनेश राठोड
बेलखेडा तांडा,(नागद)
ता. कन्नड, जि. औरंगाबाद
मो.9359360393
    7391939846

________________________________________

वसंता...

वसंता,गोर बंजारा समाजेन,

तू केसुला सम बहरायो.

हामारो वसंता...रे तू...

समाजेन दिशा वतायो..

11 वर्ष मुख्यमंत्री पदेर,

तू इतिहास घडायो.

वसंता,सारी जगेम रे तू,

महानायक केरायो..

हरित क्रांती रो तूच प्रणेता,

तूच हेतो गोरुर जीवनदाता..

आज तारी जयंतीर दन

तारे चरणेम मेला छा माथा..

कवी दिनेश राठोड (जिजाईसुत)

_____________________________________________

बोलो सेवालाल

आपणे सेवालालेरी जयंती सारी हेन मनावा.
गोर बंजारेरो राज आब आपण लावा.
15 फेब्रुवारी जगेम घुमरो......२
एक साथ बोलो.....
बोलो सेवालाल सेवालाल बोलो सेवालाल सेवालाल...

अरे बंजारा वाघेर ताकद आब दखाळादो,
आपणे सेवारो झेंडा सारी जगेम लगादो.
दिनेश हात जोडनं, केरो जगेन,
बोलो भाईयो बोलो सेवालाल सेवालाल सेवालाल.....

वसंतारो आपणेन सदा साथ छ,
सेवालालेरो आपणेन आशीर्वाद छ.
वसंता फुलरो जगेम,एक हेजाव लढेन,
बोलो भाईयो बोलो सेवालाल सेवालाल सेवालाल....

©️®️ गीतकार: दिनेश राठोड
चाळीसगाव (जळगांव)
मो.9359360393
    7391939846
_________________________________________